Connect with us

Zohchun Awktlak Biazai Tial Thiam Nu Sung He Biaruahnak ( Interview)

Biazai

Chin

Zohchun Awktlak Biazai Tial Thiam Nu Sung He Biaruahnak ( Interview)

1. A hmasa bikah na konglam, theihternak na kan tuah kho hnga maw?

Lehnak: Keimah ka min cu Sui Len Sung Hrangtlung a si i Nusung asilole Sungsung tiah an ka auh. Hriangkhan khuami Pu Van Mang (Tleica) le Pi Ca Khen hna i an fale lakah pathumnak ka si. Australia Melbourne ah ka um.

2. Nunu Biazai cauk cu mipi nih an duh ngai a hung lar taktak kan in lawmhpi tuk ve, hi cauk chuahnak ahhin caan zeitlukin dah na pek?

Lehnak: Hi biazai cauk chuah khawhnak ding ahhin caan saupi timhlamhnak ka ngei ve. Mino te zong ka si tikah, rian zong ka rak ttuan rih lo caah tangka lei chambaunak ruangah le ka thiamnak zong har deuh rih seh tiah caan saupi ka hngah hnu ah ka hun chuah khawh hi a si. Timhlamhnak ah cun kum 1 leng ka rau ko.

3. Nunu Biazai cauk na chuahnak hi zeiruang bik ah dah a si?

Lehnak: Hi cauk ka chuahnak a ruang bik cu Biazai ttial hi ka ngakchiat tein ka rak uar tuk ruangah le Biazai ttial zuamnak pawl i teinak cotu pawl Biazai hna kha pakpalawng si ter ka duh lo caah a si. Cu lawng siloin ngakchiat tein ramdang a phanmi mino hna zong nih Laica le Holh tete hi kan philh lo, kan tlaihchan rih ko ti langhter zong a si fawn.

4. Laimi mino hna lakah Biazai ttial kan um tuk lo, zeiruang bik ah dah a si.

Lehnak: Minung timi cu uarmi le zuammi thil hi aa dan cio tikah Biazai ttial hi kanmah uar phun a si lo ca zongah a si kho ko. Cun Biazai nih hin midang thinlung damternak (therapy) caah hmanrua a si ti zong kan i fian rih lo ca zong a si kho ko.

5. Biazai ttial hi cawn a haumi a si maw, zei bantuk thiamnak (skills) dah a herhmi a si?

Lehnak: Cawn a hau ti cu a si lem lo nain tam deuh theih duh cun biazai saupi a ttial cangmi hna sinah ruahnak hal ahcun theih hngalhnak cu a kau deuh ko. Cattial timi cu cawn zongah a ttha tthiam ko nain, mah nih uar ve le duh ve hrim a haumi a si tiin ka ruah. Lai biazai ttial thiam duh ahcun Laica biatak ngai in kherhhlai cu a hau ve hrim, Laica kan thiam deuh deuh cun kan thinlung ummi kha biafang in kan chuah khawh deuh i mi thinlung zong a tongh khawh deuh tiin ka ruah.

6. Vawlei cung ramkip um Laimi nih na cauk an rak cawk cio kan hmuhtheih tikah teinak nganpi na hmuh ti a lang, hi hnu hmailei ah tah Biazai cauk chuah naa tim ti maw?

Lehnak : Kaa tim ko. Ka dam paoh ahcun chuah khawh hi ka duhmi cu a si ko. Mipi thazaang peknak zong tampi ka herh rih lai.

7. Laimi nih laiholh Laica kan aupi tuk nain cheukhat nih Kawlholh le Mirang holh a doh bakin a domi kan um ve caah, Laiholh le Laica dirkamhtu seino ngaknu pakhat dirhmun in zeitindah na hmuh ning a si ve?

Lehnak: Vawlei cung hi Laiholh lawngte hmannak a si lo caah miphun dang holh hi kan doh awk cu a si lo tiin ka ruah. Thiam tu a zuam in kan i zuam awk a si. Asinain Laimi kan si ahcun Laiholh te hi ttanh a hau, kan philh lo a hau i Laimi sin cun Laiholh te hman hi aa dawh ko tiin ka hmuh. Mi phun ramdang holh cu thiam i zuam u sih law, a herhnak tu ah hman i zuam u sih. Laiholh tu cu kan hman khawhnak hmun paohah hman ahcun a ttha tuk chin lai tiin ka ruah ko.

8. Ramttha ummi Chin miphun hna hi kan holh le kan phunglam kan thlau te ko lai tiah na zum maw?

Lehnak: Hi kong ahcun miphun dawtnak kan ngeih le ngeih lo nih a ngeih te lai. Atu lio ka hmuh ning cun kanmah chan hin cun a tlau lai ti cu ka ruat rih lo. Caholh le nunphung a dawmi kan um rih ko in ka hmuh. Ramdang i a phanmi hna kan fa le i an fa le chan ahkhin cun hngalh lo a si ko. Pu le pi, nu le pa hna nih zeitlukin dah Laica le Holh kan dawt ti tu nih a langhter te lai cu.

9. Naite i US ah tuahmi CYONA ah Myanmar Vice President Van Tthio nupi Dr. Anna Sui Hlawn cu mirang holh a hmang tuk tiah mipi nih an soisel ngaite, zeitindah na hmuh ve?

Lehnak: Hi kong ahhin cun ruahmi dang ka ngei lem lo. Amah zong mifim pakhat kan i ngeihmi a si tikah a tuahmi thil hi a herh a ti ca zong ah a si kho ko. Keimah zong nih ka zoh ve tikah, Laiholh a hmannak tete zong a um ve ko i, Chin Zaatlang Holh (Chin Common Language) kan ngeih lo tikah Laiholh a rak thiam lomi hna zawnruahnak he a hman ca zong a si kho ko. Hmailei tu ah cun kanmah le miphun nii le caan cun kanmah Holh te lawng hman khawhnak caan khi um te seh ti cu kan saduhthah a si cio ko lai dah.

10. Chanthar Lai mino na hmuh ning tlawmpal in rak kan chim ta law kan duh ko, cun siaherhnak bia cah na duhmi?

Lehnak: Keicu mino te lawng ka si ve tikah hlan mino an sining he tahchunh cun tam tuk cu ka hngal lem lo. Asinain kanmah mino sining zoh cun kan tthangcho ngai ngai, fimnak lei, thiamnak le, Caholh lei siseh ruahnak lei zongah kan hun tthangcho ngai ngai ko. Ka siaherhmi tu cu, sining a tthangcho chin chin, nunning zong an sang chin chin, hmuhmi zong a tam chin chin tikah lam kan tlau lo ding a biapi tuk. Zei bantuk in chan aa thlen zongah Pathian le kanmah le kanmah i dawt hmasa hi philh hna hlah u sih law ka duh bikmi a si. Rang tuk in aa thlengmi caan ahhin timhcia tein kan um lo cun kanmah nunnak lila ca zongah ttih a nung khomi a si caah kan thlarau ca le kan pumsa caah timhcia tein, tthawng tein um hi a ttha bik ko.

11. Australia Lai mino na uar cem hna nak le na uar lo bik hna nak a ruang phun 2 veve in?

Lehnak: Australia ram mino ka uar cem hna nak a ruang cu Pathian ttihzah buin an ummi le ram le miphun dawtnak lungput an ngeihmi lawng siloin ramdang an um ko bu zongah Lai ruahnak te an thlau lonak ahhin ka uar bik ko hna. Uar lonak ngai ngai cu a um lem lo. Nain catang sangpi phanh i tim loin rian lei deuh ah kan lung a ummi hi cu kan thlen a herh deuh ko rua tiah ka ruah.

12. Laikhal pawl caah a biapi bikmi biahalnak cu, duhdawtmi na ngei cang maw?

Lehnak: Nunu Biazai duhdawtnak a rumtertu duhdawtmi cu a um ko cang. 

13. Nunu Biazai cauk hi cawk awk a um ti maw, cawk a duhmi nih khoika ah dah an cawk khawh lai?

Lehnak: US lei ahhin zuar an thawkkaa te lawng a si rih i, US lei lawng ahhin cawk awk a um rih. Cu lo paoh cu manh dih a si cang caah cawk awk a um ti lo. A ran khawh chung rang in nam (print) tthan kaa zuam lai i keimah facebook account (Nusung Hrangtlung) sinah pehtlaih peng khawh ka si ko.

14. Kan biahalnak na kan leh caah kan i lawm tuk. Pathian nih naa tinhmi lam thluan ah thluachuah in pe ko seh.

Lehnak: Kei zong kaa lawm tuk ve. Bawipa nih thluachuahnak in pe ko hna seh.

 

Note: Nunu Biazai cauk cu Uk 500 a chuah i caan zeimawzat ah a dih colh caah le a duh mi an tamtuk rih caah a thar in namthan a timh cuah lio asi.

Click to comment

Leave a Reply

Your email address will not be published. Required fields are marked *

More in Chin

To Top