UNHCR Nih Chin Ralzam Thim Ding Pahnih A Kan Pek Lai Zeidah Kan I Thim Deuh Awk Asi

June 13, 2018 ah Malaysia Chin Community  hruitu pawl le UNHCR cu tonbiaruahnak an ngei, Chin mi cu kan ram a daih cang caah kir ding in forhfial kan si i thla 18 chung caan  pek kan si.

Hmaikum 31.12.2019 thok in cun Chin ralzam kan caah UNHCR zohkhenhnak a donghnak bik a si cang lai. UNHCR nih Chin ralzam hna caah thim ding mi pahnih a kan pek lai mah cu August 1 ,2018 in an thok lai.

Card silole catlap renew (thlen) nan kal tik ah thim ding mi cu an i chim te hna lai

1.  RSD interview tuah na duh maw tiah hal nan si lai, RSD biahalnak timi cu ralzam ah cohlan awk a tlak maw tlak lo timi kherhhlainak asi. Cu caah ralzam ka sinak tuanbia hi RSD interview ah ka hal ko uh tiah na ti hna ahcun thla 2 chung ah cu biahalnak cu lim khawh a izuam lai. Na sungh sual ahcun UNHCR minung na si ti lai lo. zeihmanh an i tlangtlak ti lai lo. RSD biahalnak hi 2013 zunglut pawl minung 6000 leng an tuah cang hna i a awng mi an um lo ti awk asi cu caah RSD biahalnak cu na phit hlan i a result cu na fiang pah cia ko lai tiah ka zumh.

2.  RSD phit na duh lo i (punghmaan) a sining kel te in kal na duh ko ahcun  2019, December thla tiang card/catlap an i pek lai, 2019 december thla dih hnu in cun Chin mi kan dihlak in UNHCR minung kan si ti lai lo tinak khi asi, zei kan ton zong a kan tlangtlak ti lai lo.

Acunglei thim ding mi pahnih ahhin Chin mi nih cun number 2 nak hi kan i thim deuh awk asi, aruang cu kumkhat  le cheu caan kan ngei tinak asi caah cu chung ahcun umkalnak tangka i kawl cia khawh asi leng tuah duh mi tete tuahnak ah caan sau deuh kan ngei lai. Number 1 khi cu RSD interview na sungh sual ahcun thla 2 lawnglawng caan na ngei tinak asi.