Connect with us

Thawngthachimtu, Thawngtha Bia & Thawngtha Bia Ngaitu

Pathian thawngtha

Religion

Thawngthachimtu, Thawngtha Bia & Thawngtha Bia Ngaitu

2016 ah khan, “aziah kan hnu zerh naa pumh lo?” tiah riantuanti hawikom pakhat cu bia hal. Ahmai kum ah hawikom dang pakhat sin ah, “aziah kan biakinn ah kan hmuh ti lo, biakinn dang ah naa pum deuh hlah maw?” tiah ka hal ve. An ka lehmi cu, “biakinn pumh nak cun “YouTube” in thawngtha bia ka ngaih ah thazaang ka la deuh,” tile, “an chimmi thawngtha le kan chantiluan aa pehtlai lo” ti hi an si. Cucu, pulpit cungin thawngthachimtu hna nih tahchunhnak kan hmanmi hna le thawngtha bia kan chimning, cun thawngtha bia ngaitu mipi dirhmun kan hngalhlo ruangah a si hnga maw tiin ka ruat. Cu kong cu, fiang deuh in tial chap ka duh.

Thawngthachimtu cheukhat caah chawlehthalnak, biaknak le cawnpiakning, pumpak hlawhtlinnak le hmuhtonmi, cun midang sining hna chim hi tahchunhnak lak fawibik ah ruah a si. Cu hna lakah, mah pumpak le midang sining dikthlir in chim hi fawi khun sehlaw a lo. Angaingai ahcun, mah pumpak sining phuan cu mah le mah sunparnak i pek a si i Pathian kha sunparnak kan pe tawn lo. Cun, midang sining dikthlir in phozaar zong pulpit cungin mi kong caih le mipi upat lo he aa khat.

Cuti mi pakhat chiatnak, thatnak le palhnak tbk tahchunhnak ah kan hman cu an pumpak sining i runveennak hauhruang kan bauh piak hna zong a si. Cunih cun, biakinn pumh ngam lonak/pumh huam lonak hna, Pathian riantuantu hna he zalong tein bia i ruahngam lonak hna le ngaihchiatnak, nun harsatnak, lungdonghnak le lunglomhnak chimrel ngam lonak tiang a chuahpi kho. A zumhnak a derthawmmi hna, harnak le ngaihchiatnak nih a chilhmi hna, mah le mah thah duhnak tiang khua a ruat cuahmahmi hna le Pathian rian tuantu hna i hawikomhnak cahtertu zong an si kho rih. Cute cu ruat buin tahchunhnak kan hmanmi kongah kan i ralrin deuh ding ah chim ka duh. Pastor, Evangelist le News tialtu hna sin i biachim cu ralrin a herh tiah mipi hmurka in a chuak tawnmi khi thawngthachimtu hna caah phuahmi fimchimtu capo phunkhat a si tiin a sullam kaa keh.

Pathian mihman pakhat nih, zeidah kan chim i zeitindah kan chim timi nih thawngtha bia sullam a ngeihter tiah a chim (Robinson 2014, 149). Cheukhat Doctor, Reverence or Senior Pastor le Evangelist (or Free Evangelist) cu pulpit cungin mipi faktuk in soisel kan hmang. Biatak cawnpiaknak, palhnak cawnpiaknak alnak le palhmi remhnak, cun ding tein nunnak ding cawnpiaknak hna cu bianem in chim ah a ngaih a nuam deuh i lungah a caam deuh ve. Zerhpini pumh loin rian a tuanmi cheukhat sinah nikhat hlawhmi chapmi hmuh duh (double pay) ruahah naa pum lo tiah sualphawt loin, Pathian bia ngaihnak thawng an co ding thluachuah cu nihnih hlawhman hmuhmi nih a cawk khawh a si lo zia an fian dingin kan chim a herh deuh.

Cun, internet kongah Facebook, Instagram le computer le mobile game in caan a liamtermi mino cheukhat sinah zeirellonak bia kha hrial i computer le internet nih a chuahpimi thatnak le hmanzia thiam lonak nih a chuahpimi rawhralhnak hna tam deuh kan chim ah san a tlai deuh hnga. Holh dawh le bianem nih mino khua a ruahter deuh i awhrang in chimmi bia nih thinhunnak a chuahter tawn ve. Kan mit, kan kut, kan hmaifang le kan ke cawlcangh ning nih bia in kan chimmi tluk in, kan chimmi nak hmanh in, a sullam a fianter deuh. “Khrihfabu nih a herhmi cu pakhat le khat kar ah zawnruahnak le dawtnak ngeih hi a si,” tiah na bia ngaitu hmai i na kuttum na thinvo i na sik hna lio awcawi nih, thutden tlar ah athumi mipi nih na chimmi dawtnak kong nangmah nih na fian ngaingai le fian ngaingai lo kongah lungawtawm in khua an ruat, tiah catialtu pakhat nih cun a chim (Robinson, 150). Thawngtha bia na chim ah zeitin dah na chim ve?

Aa thleng cuahmahmi chan he aa tlak in mipi nih anmah le thutdirnak hmun cio thilsining hoih in nunpi ding fiang hlang in chim dingah thawngthachimtu nih tuanvo kan ngei. Tahchunhnak ah, lih chim in ralzaam sinak a sawkmi paohpoah hell ah an tla lai tiah phuannak in ralzaam si chinchap hlei ah khamhnak a co lomi paoh cu Satan ram hell (mei tihlipi) chungah paih an si lai tihi, ram2nak le ram3nak khuasa Laimi phun nih kan theih a herh deuh tiah ka ruah.

Cupin ah, ralzaam dirhmun in kan kiangkap zumlotu hna sinah khamhnak thawngtha chim dan ding kan cawn piak hna ah hman a tla deuh seomo. Cun, chanthar mino cheukhat nih zeibantuk nun nuamh lonak dah kan ton timi zong Pathian riantuantu hna nih pumpak hrimhrim in hngalh kan i zuam a herh in ka thei.

Miphun dang le ram dangah ralzaam sinak kard ngei loin chungkhar pawcawmnak ruat in rianhrang a tuanmi kan si pinah, tihphannak in a khatmi kan si caah harnak le ngaihchiatnak nih fawituk in a kan nun a phum colh tawn. Culioah, thlarau in a thihruaitu Pathian rian tuantu hna nih kan mipi denhmi safety kedenh i hruk chunh in an dirhmun kan hngalhfian hnu ah Pathian bia in forhfialnak kha kan chimchih lengmang a herh. “An chimmi thawngtha bia le chantiluan aa pehtlai lo” timi bialehnak nih member dirhmun hngal loin Baibal theihnak pakhat lawngin thawngtha chimtu kan si sual maw tihi pumpak in kan ruah than a herh.

Adonghnak ah, Facebook, Web le Blog in mipi nih Pathian rian tuantu soiselnak comment ah kan tial tawnmi kongah tial chap ka duh. Christian Theology le Doctrine i dannak he aa pehtlaimi an si caah hitihin fianternak caah chim ka duh. Theology le Doctrine cu hmuhning aa khatmi mibuu pakhat asiloah Khrihfabu nih a ngeihmi le cu cawnpiaknak aa hrawmmi dihlak hmunkhat ah a kan funtomtu an si. Baibal ah a fiang tung i cuhe aa kalhmi cawnpiaknak cu biatak cawnpiaknak hmangin kan doh ding a si ko.

Sihmanhsehlaw, Baibal ah a fiangset lomi kongah hmuhning aa dannak hna cu aruang fiangtein hngalh kan i zuam ah kan caah thiltha an si deuh. Pathian biatak kan tanh kan ti lioah, Khrihfabu le Khrihfa kar ah dohnak a chuahter tu Satan hman rua rak si diam khawh a si. Cucaah, kan lu a simi Khrih ah alam kip in kan than khawh nakhnga, biatak cu soisel nak in chim si loin dawtnak tuin chim hram awt hna u sih.

Saya Bawi Lian Thang

Click to comment

Leave a Reply

Your email address will not be published. Required fields are marked *

More in Religion

Facebook

Rel Bikmi

To Top