Taliban ralhrang nih Checkpoint ah palik 9 an thah

Ghazni Official nih nihin March ni 30 i report an pek ningah Afghanistan nichuah lei khawpi Ghazni ah Taliban ralhrang nih Palik an ambush i Palik minung pakua an kah thah tiah report an pek.

Taliban ralhrang nih Palik an luhhnawh nak hi Palik Checkpoint ah asi i nizan Cawn ni 5 ni zingka ah khan asi i Check point pahnih bak peh zulh in an kah tiah Ghazni Palik bawi Ahmad Khan Seerat nih achim.

Taliban ralhrang meithal kah nak ah hin Palik minung pakua an thi i midang paruk fak ngai in kah hliam an si. Taliban ralhrang lei athi mi an um theih asilo.

Afghanistan President Ashraf Ghani nih achim ningah Kum 2014 President i thim ka si i atu tiang Afghanistan Palik minung 45,000 Taliban ralhrang kut in an thi cang tiah achim.

Hi lio ah Afghnistan nitlak lei ah tilet atho i Minung 32 an thih pinah midang 12 tinih afenh hna, khawsak nak inn 700 renglo um nak tlak lo in Tilet nih ahrawh i minung Tingkhat leng hmun him lei ah an zam tiah Afghanistan’s National Disaster Management Authority lei nih an chim