Saudi Arabia Nu Pawl Cu Lawmhpi Phu An Si Ve

Saudi Arabia ram ah nu pawl cu kum caan saupi chung mawtaw mawnghnak nawl an rak ngei lo, asinain kan hnu zarhpini ahkhan  nu pawl  mawtaw mawngh nak nawl pek an si ve cang. Atubantuk in mawtaw mawnghnak nawl an hun pek tthan hna tik ah nu pawl caah mawtaw mawngh rian a hung um deuh cang lai.

Mawtaw mawngh rian hi Saudi Arabia ram ahcun pa pawl lawng nih tuannak nawl an rak ngeih, asinain naite tiang ahkhan Saudi Arabia pa pawl hi mawtaw  mawngh rian an tuan hlei lo. Hi bantuk riantuan mi hi thlahlawh a tlawmmi ram India, Pakistan, le Bangladesh  pa pawl le ramdang pawl rian asi tiah an ruah mi asi.

A tucu hlawn khawh asimi Uber mawtaw tibantuk in riantuan a duh mi Saudi Arabia nu pawl tampi an hung chuak cang asinain pa nih namnehnak le hipnak ram asimi Saudi ram ahcun fawite in thlennawnnak aum kho rih lai lo ti asi.

Mawtaw mawng riantuan a zuam mi nu pawl ca ahcun hi rian hi tangka hmuhnak lam pakhat asi leng ah an mahte in izohkhenh kho lai i zalong deuh in khua an sak  khawhnak nak lam le caan tha pakhat asi ve.

VOA