Connect with us

Nikhatkhat Ah Cun.. Nang Zong !!!!!

nangzong

Education

Nikhatkhat Ah Cun.. Nang Zong !!!!!

Nikhatkhat Ah Cun…Midang thinlung na fahter i an ning na zahter bantuk khan nikhatkhat ah cun pakhatkhat nih na lung an fahter ve lai i, na ning an zahter ve te lai. Cutik ah cun midang lungfahter le ngaihchiatter a ṭhat loning, midang cungah kan tuah bantukin kan cungah a rak kir ṭhanning cu na fiang ve te lai.

Mi pakhatkhat nih amah kaltak lo dingin le ṭhen lo dingin (a palh lo buin) zaangfah an nawl bantuk khan nikhatkhat ah cun midang kha zaangfah na nawl ve te hna lai. Cutik ah cun ruahchannak zong ngei kho ti lo dingin harnak le ningzahnak hna cu na hawikom ṭhabik a si ve te lai.

Minung pakhatkhat kha zei ah na rel lo i, a hmannak zongah palh na puh i, thilsual tuahtu bangin sual na phawt bantuk te khan nikhatkhat ah cun mi pakhatkhat nih na hman konak zongah thilsual tuahtu ah an puh ve te lai. Na hman konak zong kha dirpi khawh lo can na ngei te lai.Cutik ah midang zei rel lo le sualphawt a ṭhat lonak cu na fiang ve te lai. Cucaah midang cung i na tuahsernak bangin na cungah a rak tlung dingmi kha na hngalh ve ka duh e…

Mi nih an i zohthla tukmi an fanu, an dawt i an ṭihzahmi le a duhnak vialte tlinter piak in, arti bang a kuai sual lai tiah an zohthlami nu cu ngeih hrimhrim dingin zumhtlak ngaimi bang a hmaika ah bia naa kam ko buin an duh lo caah thi dengin zaangfah na nawl i an duh lo ruangah, thazaang in na hro i a par na ṭawh hnu ah lungfak ngaiin na kaltak bantuk khan, na farnu asiloah na fanu dawt tukmi kha midang pakhatkhat nih an tuah ve hnu ah lungfak ngaiin an kaltak ve te lai.

Cu tikah cun an dawt tukmi an fanu/farnu thianhlimnak ṭawhpiak hnu ah lungfak ngaiin kaltak a ṭhat loning cu na hngalh ve te lai. Cucu na duh ve hnga maw? Midang cungah kan tuah bantuk hin kan cungah asiloah kan chungkhat hna cungah midang nih an van tuah ve te lai, ti kha na min na philh lo bangin philh ve hrimhrim hlah…

Mi pakhatkhat sinah naa uah ngai i ṭhaṭhi in na chonh duh lo bantuk khan nikhatkhat ah cun midang nih na sinah an van i uah ve lai i kawmh na duh tuk ko zongah na pawng um an duh lai lo can a phan te lai.

Cu tik ahcun midang cungah i uah le i zumh a ṭhat loning cu na hngalh ve te lai. Midang cungah na um ningte khan mi pakhatkhat nih na cungah an rak um ve te lai. Cutik ah cun ngaihchiatnak le i ngaihchihnak lawng na co dingmi a si te lai…. Cucaah, kan cungah thilṭha tlung seh ti kan duh ahcun midang cungah thilṭha tuah hmasa hna usihlaw, thil ṭhalo tuah lei ah a khulnuarmi le thil tha tuah ah a khulrangmi si i zuam cio hna sih….

By: VT Hrin

Click to comment

Leave a Reply

Your email address will not be published.

More in Education

Facebook

Rel Bikmi

To Top