Connect with us

Myanmar Ram Ah Acozah A Ser Khotu Party Pa (3)

CNLD

Politics

Myanmar Ram Ah Acozah A Ser Khotu Party Pa (3)

Three Parties Able To Form A Government in Myanmar)

2020 thimnak nih acozah thar a hrin te lai. Acozah a ser kho te ding party pa (3) an um. Cu hna lak ah party (2) cu anmah lawng in acozah a ser khotu an si. Adang party pakhat hi Kawl aw chuah in “Pit taing thong”, Senthang awchuah cheukhat in “Vua Kip Dia” le Mirang nih “Jogger” an timi kha a si. Amyotha Hluttaw le Pyithu Hluttaw MP fonh ah thutdan 333 a hmumi nih acozah a ser lai.

State le Region MPs Dirhmun

State le Region Hluttaw MPs dihlak hi 660 si ding asinain 644 lawng thim an si. Township pakhat ah State/Region Hluttaw MP pa (2) cio thim an sinain Naypyitaw ah a ummi Township 8 aiawh caah pakhat hmanh thim an si lo. Phunghram 394 (a) nih Amyotha Hluttaw le Pyithu Hluttaw MP ca lawnglawng thimnak nawl a pek. State/Region Hluttaw MPs dihlak cu hitihin asi. Kachin –36, Kayah-14, Kayin-14, Chin -18, Mon -20, Rakhine-34, Shan-110, Mandalay-56, Yangon -90, Magway -50, Sagaing -74, Irrawaddy-52, Bago-56, Tanintaryi-20, Naypyitaw-0. An dihlak in 644 an si. Thim lomi ralkap kong cu ka langhter lo.

Township pakhat ah MP pa (2) cio in thim an si. Myanmar ram chungah Township 330 an um. State le Region Township um tu ning cu hi ti hin a si. Kachin –18, Kayah-7, Kayin-7, Chin -9, Mon -10, Rakhine-17, Shan-55, Mandalay-28 – Naypyitaw telh chih lo in, Yangon – 45, Magway -25, Sagaing – 37, Irrawaddy-26, Bago-28, Tanintaryi-10, le Naypyitaw- 8 cio an um. Vanchiat ah an nih cu acozah dirhnak caah asiloah President thimnak ah an i tel lo.

Chin State chim lo, adang State le Region 13 ahcun Ethnic Affairs Ministers thim an si dih. Cu hna cu Kachin –4, Kayah-1, Kayin-3, Chin -0, Mon -3, Rakhine-1, Shan-7, Mandalay- 1, Yangon – 2, Magway – 1, Sagaing -2, Irrawaddy-1, Bago-1, Tanintaryi- 2 cio thim an si. Chin miphun aiawh in Sagaing ah pakhat, Rakhine ah pakhat, Magway ah pakhat thim an si ve.

State le Region Hluttaw MP caah kan thimmi hna hi a cheu cu rian pahnih a kemhmi MP an si hna. Cu hna cu Ethnic Affairs Ministers caah kan thimmi MPs hna le Acozah ah ministers caah rian pekmi hna hi rian pahnih (double role) a kemhmi an si. Ralkap kong pakhat hmanh ka telh lo.

Pyidaungsu Hluttaw asiloah Amyotha Hluttaw le Pyithu Hluttaw Dirhmun

State le Region pakhat cio nih Amyotha Hluttaw MP 12 cio thimnak nawl pek an si. State pa (7) le Region pa (7) a um caah pakhat cio nih MP 12 cio an thim tikah Amyotha Hluttaw MP dihlak (12×14=168) an si. State nih Amyotha Hluttaw MPs dihlak = 84 le Region Amyotha Hluttaw MP dihlak = 84 an si. Amyotha Hluttaw Ralkap MP dihlak = 56 an si.

Thimmi Pyithu Hluttaw MP dihlak hi = 330 an si. Myanmar ram chungah Township 330 a um caah Township khat ah Pyithu Hluttaw MP pakhat cio thim an si. State dihlak chungah Township dihlak = 123 a um. State ah Township a tam bikmi cu Shan State a si. Township 55 a um caah Pyithu Hluttaw MP dihlak 55 thimnak nawl an ngei. Region dihlak ah Township 207 a um caah Pyithu HLuttaw MP dihlak = 207 thim an si.

Pyithu HLuttaw Ralkap MP dihlak = 110 chuahpi an si ve. Kayah, Kayin, Chin, Mon le Tanintharyi ahcun Amyotha Hluttaw le Pyithu HLuttaw thimhmun dirhmun hi aa khat pah. Asinain adang State le Region ahcun Township a tam tuk caah State le Region aiawhtu Amyotha Hlutaw MP caah i zuam hi an tih ngaingai.

Acozah Sernak caah Party (3)

Myanmar ramchungah Township 330 a um. Acozah sernak caah Amyotha Hluttaw le Pyithu Hluttaw nih biachahnak a tuah. Cucaah acozah a ser khotu ding party (3) kong ceih tuah hna uh sih. State pa 7 Amyotha Hluttaw MP le Pyithu Hluttaw MP fonh = 84 +123= 207 an si. Region pa 7 Amyotha Hluttaw MP le Pyithu Hluttaw MP fonh = 291 an si. Amyotha Hluttaw le Pyithu Hluttaw Ralkap MP fonh = 56+110=166 an si. State le Region le Ralkap MP dihlak fonh = 207+291+166= 664 an si. Acozah ser khawhnak caah ralkap MP telh in Amyotha Hluttaw le Pyithu Hluttaw MP dihlak 664 chungah 333 a hmuhmi party asiloah ralkap MP telh lo in thimmi MP dihlak =498 chungah 333 a hmuhmi pakhat nih acozah a ser khawh tinak a si.

(1) USDP cu ramchung township dihlak a zuam khomi party pakhat a si. Cucaah 2010 thimnak ah 51% leng pi teinak a hmuh caah hawikom sawm lo in acozah fawi tein a ser khawh. 2020 thimnak zong ah Amyotha Hluttaw le Pyithu HLuttaw fonh in 51% leng a hmuh ahcun acozah a ser khawh than lai.
(2) NLD nih 2015 thimnak ram pumpi dihlak ah aa zuam. Teinak a hmuh. Acozah amah lawng in fawi tein a ser khawh.
(3) 2020 thimnak ah NLD nih amah lawng in acozah a ser khawh lai maw asiloah USDP nih amah lawng in acozah a ser khawh lai maw timi biahalnak hi a lar ngai. Teitu party pakhat lawnglawng nih acozah fawi tein a ser khawh ahcun chim ding a um ti lo. Aser khawh lo ahcun atanglei bantukin Jogger a tuan ding pakhat a um.
(4) NLD asiloah USDP pakhat khat nih Amyotha le Pyithu fonh dihlak ah thutdan 333 a hmuh lo ahcun “Jogger” – hawikom (coalition) a kawl a hau.
(5) Jogger hna lakah Jogger ngan bik cu Ralkap a si. Region dihlak ah NLD nih a tei dih ahcun thutdan 291 lawng a hmuh lai. Shan State nih Pyithu caah MP 55 le Amyotha caah pa 12, an dihlak fonh ahcun 67 a si hnga. Shan he an i fonh ahcun chim hau lo a si. Fawi tein acozah an sere khawh hnga.
(6) USDP nih Region dihlak a tei ahcun 291 + ralkap 166 he aa fonh ahcun = 457 thutdan a hmuh lai caah fawi tein acozah a dirh khawh lai.
(7) NLD nih amah tein a ser khawh lo ahcun SNLD + ZCD he maw aa fonh lai? Ralkap he dah aa fonh lai? Adang tlangcung party he dah aa fonh hnga? USDP he cun fonh a duh men lai lo.
(8) USDP nih amah lawng in acozah a ser khawh lo ahcun ralkap he aa fonh lai. Cun adang rawnram dirhmi party he maw? Tlangcung party he dah aa fonh hnga? Tlangcung party nih tah USDP le ralkap he fonh cu an duh hnga maw?
(9) Tam pi chim awk a um. Asinain fact zoh chih in hrihfiahnak tuah kha a ngan dam deuhmi pawlitika ceihkhannak a si men lai. A fiangmi cu party pakhat nih acozah a ser khawh lo ahcun Jogger ngan ralkap nih caantha hmuh a fawi te ti kha a si ko.

Lungsau tein hi ca a relmi nan dihlak cungah kaa lawm. Number ka tial sualmi a um ahcun zangfahnak tein ka chim than te hram uh. Table zong hmanthlak in ka tarmi ah zohchih khawh a si lai.

(Thawng Za Pum)

More in Politics

Facebook

Advertisement Enter ad code here

Rel Bikmi

To Top