Jet Airway in service titawp

Lengpui Airport aṭanga India ram state danga thlawhtheihna service ṭhin Jet Airways chuan February 9, Inrinni aṭang khan Lengpui Air­port-a an service an titawp.

Vanglaini palai zawhna chhangin GAD (Aviation Wing) hotute chuan, Jet Airways-in February 9 aṭangin Leng­pui Airport-a an service an tihtawp tâk thu an sawi a, “Sum lama har­satna an tawh avangin hmarchhaka an service chu an titawp deuh vek a, Guwahati-ah chiah an service chhunzawm dawn a ni,” an ti.

GAD (Aviation Wing) hotute chuan, Lengpui Airport-a service turin Indigo Airlines biak mek a nih thu sawiin, “Engtik aṭangin nge an rawn service theih ang tih hriat a ni lo,” an ti a; Indigo tih loh company dang biak an neih loh thu an sawi.

Tun dinhmunah Leng­pui Airport hi Air India chiahin an tlawh­pawh tawh a; Air India hian Lengpui aṭangin direct-in Kolkata thleng chiah thlawhna an thlawhtir a ni. Jet Airways-in service an tihtawp tâk avang hian khualzinte’n harsatna an tâwk nasa a, Silchar Airport pan mi eng emaw zat an awm ṭhin a ni.

Vanglaini