Connect with us

Hringtu Nu Pakhat Nih Pasal A Ngei Te Ding A Fanu Sin Cakuat A Ttialmi

ka fanu

Education

Hringtu Nu Pakhat Nih Pasal A Ngei Te Ding A Fanu Sin Cakuat A Ttialmi

Ka fanu……. Pa pakhat cu na duh i na vatmi a si zong ah nu le pa hnatlaknak in na vatmi a si ko zong ah amah cu na chungkhar ah lubik pakhat a si cang, Khathlei khel in chim ah cun na zumhmi le nai bochan mi a si.

Ka fanu…… Na pasal cu nangmah nih zumhnak le dawtnak upatnak he ttha tein na chawnhbiak lawngah amah nih nangmah cu an dawt ve lai i an zohkhenh an kilven ve lai.

Ka fanu…… Na pasal na tei na tlaihkhih khawh cu a ttha tuk ko, Asinain va nek in tei tuk hlah nai tei tuk ah cun na fa le tiang nih na nawl an in cawn lai i hringtu an pa cu zeihmanh ah an rel lai lo, Ttha te zong in an chawnbia lai lo, Nupi le nih tei tukmi pasal le cu an hlawhtling lo i an tthangcho kho fawn lo.

Ka fanu…… Ka pasal a chiakha a ttha lo tuk tiah vuivai len hlah pasal ttha an timi hna khi an nupi le nih an hnu lei in a thil tein an tthohdirh an chimh cawnpiak hna ruangah khi dirhmun a phanmi lawng te an si dih hna.

Ka fanu…… Pa timi cu chungkhar caah tiin mi zapi hmai ah rianttuan mi an si hna, Na pasal cu mipi hmai a hawi le hmai a rianttuan tti hmai ah zei rel lo phun in chawn bia hlah, A ningzah ter sual lai cih.

Ka fanu…… Tuluk phungthluk pakhat ah a ummi cu thlet cangmi ti cu lak khawh tthan a si ti lo, Pek cangmi fanu zong kanmah ngeihmi a si kho tthan ti lo ti a si, Cu ruangah na pasal chungkhar hna cu nangmah chungkhar bantuk in dawtnak thinlung te he chawnbia hna.

Ka fanu…… Na pasal inn na phak tik ah hringtu a nu le pa cu an hringtu na nu le pa bantukin ruat law upatnak he zohkhenh cawnghram hna,  A unau zong nangmah unau bantukin ruat hna law naihniam ngai in chawnbia hna.

Ka fanu……. Na pasal nih a lengah harsa ngai in chungkhar pawcawmnak caah tiin a tekcawl i chawva a kawl bantukin nang zong inn na um hmun in inn chungkhar a herhhai vialte tlamtling cikcek in tuah ttuan khawh i zuam ve.

Ka fanu…… Inn chungkhar tangka kong ah pasal le nih tangka an kawl tawn i nupi le nih an hman tawn, Tangka a kawltu caah hin tangka kawl hi a fawi lomi thil a si, Semrel tein hman zia a thiam mi siseh ti kan kan duh piak tuk.

Ka fanu…… Fale an tthat lo ah cun nu le pa lucung ah a tla tawn, fale chimh cawnpiak nak ah hin ka fanu nangmah cungah aa hngatmi a si, Na pasal cu a fale he an um tti caan a tlawm tuk, Na fale an tthat ah siseh an chiat ah siseh nangmah thawngin a si dih ko lai.

Ka fanu…… Na pasal he nan lung nan i hmuh lo caan ah i tthen u sih timi biafang hi na hmawt sual zong ah na ka in chuak hlah seh, Nan lakkar i sualnak a ngei lo mi na fale ca ruah piak hna.

Ka fanu……Hmuh chung khawh a si lomi caan chungah na pasal a sitthat ah cun i hrawm ve, Na pasal harnak a ton ah cun tuarpi ve, Kik ah kik tti lum ah lum tti in harnak nan tan khawh hnu lawngah a nuammi chungkhar nan ser khawh lai.

Kan chimh kan cawnpiak pah thluahmah in na nu ka mitthli a luang cun ka aw zong a ther dih ka fanu chungkhar na dirhnak ah na tlamtling hram ko seh tiah na nu nih thlaza kan cam piak.

Photo Credit: Honey Biak

Click to comment

Leave a Reply

Your email address will not be published.

More in Education

Facebook

Rel Bikmi

To Top