Connect with us

Hmailei Ah Chin State nih “Head” Lu Pahnih A Ngeih Awk A Si Maw?

Chin

Politics

Hmailei Ah Chin State nih “Head” Lu Pahnih A Ngeih Awk A Si Maw?

Zangfahnak tein nan ruahnak rak ka hrawmh ve hram uh law ka duh ko. Kawlmi nih Kala hi an huat ngai hna. Asinain Kala min pekmi te hi Kawlmi nih an I hrawm ve lengmang. Tahchunhnak ah India nih state acozah lu bik cu “Chief Minister” tiah min a pek. Chief Minister min a hmangmi hna hi federal ram ram 20 chungah India, Pakistan, le Malaysia hna hi an si. Kawlram nih an hei I lak ve. Chin State acozah lubik cu “Chief Minister” ti a si ve.

Kan tial cang lengmang bantukin rampi pakhat ah (head of state le head of government) tiah atlang piin thenhnih ah aa ten. President phung in a kalmi le Parliamentary phung in a kalmi an um. Atawinak in USA cu head of state le head of government pahnih komh, a lu bik cu President a si. France ram ahcun head of state cu President asinain Head of government cu Prime Minister a si ve. Britain ram ahcun head of state cu Sianpahrang asinain head of government cu Prime Minister a si. Germany ram ahcun head of state cu President asinain head of government cu Chancellor a si ve.

Federal ram, ram 20 chungah Chin State bantuk, State pakhat nih lu pahnih a ngeih awk a si ve maw? Ram 20 chungah lu pahnih a ngeimi hna hi ram 5 an si. Cu hna cu Canada, Australia, India, Malaysia, le Pakistan hna an si. Ram 15 nih cun atu Chin State acozah bantukin lu pakhat lawng an ngei. Professor Watts biafang ning in rampi lu min hna cu head of federal government le head of federation (head of state) le State acozah lei lei min hna cu head of regional government le head of regional state tiah min a pek hna.

Head of State government caah an thimmi hna an min pekmi hi aa khat cio ve hoi hna. Atlang piin governor, President of cantonal council, Premier, Minister President (or Major), Chief Minister, President of governing council, President of executive, President of region tiah min an pek cio hna.

Kan nih Myanmar ram tu nih cun India min pek te kan I lak ve ti khawh a si. Hmailei kan ram hi Federal Ram hei sisehlaw state acozah nih lu pakhat a ngeih awk a si ko? Ah a si lo. Lu pahnih a ngeih awk a si ko, I hruainak ah a tha deuh lai. Zeitindah nan ruah cio?

State acozah lu thim ning hi federal ram ram 20 chungah an thim ning hna phun 16 a um. Atu kan Myanmar ram ah Chin State acozah lu bik thim ning cu nan I fiang dih ko lai tiah ka ruah.

MP thimnak ah aa zuam lai. State acozah caah MP thimnak a tlingmi lawnglawng kha Chief Minister caah thim khawh a sinain Naypyidaw zungthu President nih Chief Minister thimnak nawl a ngei. Federal ram 20 chungah head of regional government le head of regional state lubik thimnak an ngeihmi hna cu hi ti hin a si.

1 ) state chungah a ummi mipi nih direct bak in thimnak
2 Kum fatin I thleng lengmangmi state acozah lu tlai tu sinak
3 Mah le state cio nih an zulhmi phunglam ning tein thimnak: acheu state acozah lutlaitu cu direct in thimnak, acheu cu state upadi sertu hna nih thimnak, state acozah riantuantu (executive) nih thimnak
4 Rampi acozah lutlaitu Prime Minister ruahnak peknak in siangpahrang nih rianpeknak
5 State acozah ruahnak cheuhnak in siangpahrang (monarch) nih rianpeknak
6 Rampi acozah ruahnak peknak in President nih thimnak ciruang chungchuak nih state cheukhat ah lubik, state upadi sertu nih thimnak
7 state upadi sertu hna nih thimnak

Adangdang zong a um len rih ko lai. Ruahawk thil hna cu:

1 MP a tlingmi chung in state upadi sertu nih Chief Minister cu thim ah maw a that deuh lai?
2 Chief Minister or governor or premier or etc.. hi mipi bak nih CM hmunhma caah aa cuh bakmi hna direct bak in thim ah dah a that deuh lai?
3 Party cio nih min an rak chuahpi mi cio dah I zuam hna sehlaw mipi nih direct in CM caah thim maw a that deuh lai?
4 MP a tlingmi a si lai pin ah thutdan tam bik acotu party nih dah hei chuahpi hna sehlaw State legilative assembly nih dah CM cu hei thim mai ding ah ma a that hnga?
5 MP a tlingmi bak hna kha party cio nih hun chuahpi hna sehlaw Mipi nih direct vote in cu an chuahpi mi chungkhan CM caah hei thim dah a that deuh hnga?
6 State Acozah lutlaitu aa zuam dingmi mi kawltu Committee pakhat khat ser hma hnu ah cu bu nih cun minung a tlom bik pa 10 hrawng chuahpi hna sehlaw cu minung hna cu I zuam hna sehlaw a tha hnga dik maw?

A muru cu Hmailei Chin State ah lu pahnih maw? Lu pakhat dah a that deuh lai ti khah a si ko.

Thawng Za Pum

Click to comment

Leave a Reply

Your email address will not be published.

More in Politics

Facebook

Rel Bikmi

To Top