Connect with us

Hlasak Thiam Van Hlei Sung He Biaruahnak ( Interview)

Van Hlei Sung

Celebrity

Hlasak Thiam Van Hlei Sung He Biaruahnak ( Interview)

The Chin Online Media nih hlasak thiam Van Hlei Sung interview kan tuah mi rak rel ve, biahaltu cu keimah June Amang ka si.

1. Nangmah konglam theihternak rak kan tuahtak law kan duh ko ?

lehnak : Aww kalawm. Ka min cu vanhleisung ka si. Ka chuahnak ka khua cu hriphi. Atuhi New Zealand ah kan chungkhar ning in khua kan sa. Kei hi Bawipa dawtnak thawngin Victoria University of Wellington ah Commerce ka kai lio i dam le tluang tein ka um ahcun hi hnu kumthum ah ka dih la.

2. Naihrawng ramkip um Chin mi nih hlasak an i sawm peng i ramdang na kal nak tete kan rak hmuhtheih peng, ram zeizat ah dah hlasak bak ah na kal cang, zei bantuk ram hna ah dah an si.

Lehnak : Bawipa dawtnak thawngin le cawisaannak thawngin dawttu le hnakkar tenhtu tampi ka ngei i kum hnih chungah khua dang tete ka phaknak tam ngai. Ram zeizat dah ka phak ti ah cun ram5 ka phan cang i cu hna cu,
– Malaysia-USA-Australia-Lairam-Denmark an si.

3. Atu tan hi tah khoka ram pawl dah hlasak ah na kal cuahmah lio asi ? Zei bantuk deuh in dah sawm mi na si ?

Lehnak : Atu hi Denmark ah hlasak dingin ka rak phan. CCDK nih an tuah mi conference ah special guest singer in an ka sawm mi ka si.

 4. Concert pawl na telnak ah philh awk a tha bak lo tiah na ruah mi experience pakhat te in hun kan chim ta ?

lehnak: Aw ka philh khawh lo cem mi cu Malaysia kha asi ko aruang cu ka phak nak hmunhma a hmasa bik asi caah a ram le a minung tiang khi ka tleihchan ngai hna. Nain philh khawh lomi caan cu Australia Chin Idol ah P. Thawng Bawi he hlasak nak caan ttha kha ka hmuh mi asi. Aruang cu ka ngakchiatte, kum 6 ka si in ka theih cangmi asi caah kha bantuk caan ttha ka hmuh kha, Bawipa thluachuah ah ka cohlan.

5. Hlan lio hla tete cover song na tuah mi hna social media an hung lar taktak, zeitindah mah idea hi na rak ngeih i na tharchuah than ning asi?

Lehnak: Hlan lio hla ka sak nak a ruang ABIK cu keimah hrimhrim nih hin ka tleihchan le ka uarkhun. Hlan lio hlasa tiang in ka sunsak hna. Aruang cu an nih cu nuhrin chuahpi mi aw, edit zong pakhat hmanh an ngei lo i originally te bak khin a chuak i ka caah cun a thiangtuk tiah ka ruah. Cun, hlan lio hla ah hin, lai bia hi a tling khun le a thuk khun tiah ka ruah. Tuchan hla hi cu Kan Nu le kan Pa hna nih an describe ning ah cun hla purpok deuh lawngte an sa a kan ti cang.  Mah caah cun hi bantuk hlan hla hi kan sak i kan ngeih cun, lai bia zong kan i chap la… lai music muru (real) a thlumalnak le a style tete zong hi mino tampi nih kan i fiang tthan lai timi ruah channak caah asi.

6. Album hna chuah na tim maw atu hi? Tuchan ahcun Album chuah hi aphu lai tiah na ruah maw?

Lehnak: AW album chuah kaa tim ko. Zeizong vialte hlan ah Pathian hla album hi chuah kaa tim. Aruang cu zuunhlasa pakhat ka si ve ko nain, thluachuah petu le cawisaangtu sinah, ‘kalawm,’ tinak le Bawipa ttihzahnak pek channak ding ca’h zong khin ka duh i asi. Atuhi hla ka khawmh cuahmah lio asi.  Thazaang a ka petu zong nih ka hla te hi ngeih an duhtuk ko nain caan ngeih lo ruangah a thok hmanh ka thok kho rih lo i ka ngaithiam uh, fak piin ka zuam lai, ti kha  chim chih ka duh.

7. Malaysia Concert tuah ahhin an buai pah lengmang i zeitindah na ruah i na hmuh ning asi, tutan Malaysia CNF concert kal na tim ti Thawng zong kan theih caah kal lai hi tah na zenh pah maw 🙂 lungthiang te in hun chim ko law kan duh ?

Lehnak: Aw 100 ah 100 ka zenh lo aruang cu hruaitu pawl le mipi tiang nih dawtnak le zaangfaknak he an ka auh mi ka si caah ka lawmtuk.  Hruaitu pawl zong nih Security ttha an auh ko hna lai ti zong ka zumh fawn.

8. Ahlan deuh na Facebook timeline post mi ah soiseltu hna cung ah aa lungrawk pah mi na lo, zei kong bik dah soisel ka tong tiah na ruah.

lehnak: Ka ngakchiat tein  keimah nih 100% in kaa fian mi cu, huatnak khi hnachuahnak in a rami asi. Cun an soiseltu le an dotu khi nangmah nak in thinlung, ruahnak le azeidang kip in a chanbau mi an si ti kha fiang tein ka theih i mah caah cun ka lungrawk lo.  Kei hi soiselnak ka tonnak a tambik cu zumhnak le ruahnak pakhat ka dirpi mi um cun ka chim i cheukhat an lungtlin lo zongah ka ruahnak cu ka dirpi.

Midang an ruahnak zong a ttha mi ka lak i a ttha lo mi cu kaa lak fawn lo, na palh na hman lo ka ti fawn hna lo. Ka ruahnak an i ttawm sual lai lo ti zong a poi ah ka chia lo. Le ka ruahnak aa hrawm ve lomi nih an ka doh tawn.😁 Ramdang minthang pawl kan zoh hna ah cun an platform khi mipi alamkip in ruahnak cheuhnak ah an hman. Kannih laimi tamdeuh cu kan dirpi mi zumhnak chim ruangah huatnak ton lai hi kan ttihtuk tiah ka ruah. Kei cu ka ttih lo.
Cun hla ka cover mi hi copy le afawinak lam in a kal ti zong ka tong i hlan hla ka sakmi hna hi a thah ti zong ka tong nain ka zumh mi le ka timh tuahnak aruang ka theih i a poi ah ka chia lo.

Chimchap ka duhmi cu, tuchan cun lam pakhat lawng a um lo. Teinak le hlawhtlinnak kawl duh ah cun lam tampi aum. Ahohmanh mah le mah i zuamcawh ding kan si lo. Pathian nih talent a kan pek ning cio in kan thiamnak hmunhma khin i zuam in hmai ah fon chin kha a biapi mi asi. Laimi hrimhrim nih cun pakhat le pakhat i doh loin pakhat le pakhat kan thiamnak le kan i dannak tete i dirkamh in thazaang i pek chih ding kan si.

9. Laimi laak ah celebrity pakhat kan i ngeih ve mi na si tik ah soiseltu le huatu dotu cu nan ngeih ve ko lai va si kaw zeitindah hi bantuk pawl hi na pah ningcang asi ( how do you cope with it) ?

Lehnak: Sau nawn cu an ka ti tluk in leh rulh ka duh ve ko hna aruang cu zeitik hmanh ah ka sining kha an thei lo le ka ruahnak taktak zong an thei lo i a thei i thiamtuk phun in bia an chim khin si a vai tawn. pheh lo te Pathian sin ah ka vuivai tawn. Ka ngeih zong a chel caan ah achia. Ka theih bal lomi minung siin soisel ka ton cu ka fahsak. “Mi hmai a lang i soisel le thlanglamh hmanh a tei kho lo”, an ti tawn nain, hlasak thiam nih khin hlasak lawng aduh. Mi he mah he tahchunh ton khi a rian asi chih lo. Mah kha ttha tein kan theih a herh.

Kei cu a ka raltu caah thla ka cam piak hna. Mah khawh khan cun ka tha a zaang i hmailei ka kal kho tthan.Cheukhat cu an thin ka hunter sual hna ka ti cun private in ngaithiam ka hal hna. A ka ngaithiam mi nih an ka ngaithiam, ngaithiam lo mi nih ngaithiam lo. Vawlei cu a si phung si ko.
Lungdai le lungthiang tein nun kha a biapi.

10. Pasal caah mirang pa maw na duh laipa, zei bantuk pa dah na uar phun an asi ?

Lehnak: kei mah pumpak duh thimnak in cun a zungzal in Laipa 😁 Pathian nih kan mah dawttu le kan caah a tthabik atimi a kan chiah piak cio ko nain keimah pumpak ah ka duhmi pa cu ritnak (dinmi, hmawmmi le khaimi) a tawng bak lomi. Mah hi a biapi cem. Vawlei ah santleihnak pakhat hmanh a chuah pi lomi thil asi😁 Cu khawh cun keimah ka sining tein a ka cohlang mi le hmailei innchungkhar sertik zongah bochan le zumhawktlak mi pasal cu aho nu ca poh ah an ttha. Cun amah kha, pasal ttha tiah aa zum ve bakmi. Phorhlawt le ruamkai tiang cu si lo nain… bochan awktlak asimi, ‘kai za’ ai timi pa sin cun hna a ngam deuh la ka ti 😂

11. Lai Miphun le ram thanchonak caah zeidah aherh bik tiah na ruah ?

Lehnak : Tangdornak, lungrualnak. keimah tiin kan i seihchiah dih cun hruaitu zong hruaimi zong kan si kho lai lo.Tangdornak nun in lungrualnak asi i hi hna pahnih thinlung te hi kan ngeih cun a hmanmi lam in kan thangcho ko lai ti ka ruah.

12. Lai mino hna sin na lung siaherh biacah hun chim law kan duh ko?

Lehnak: Abik in lai mino kan tlaunak a hram a thoknak cu, Bible cawnpiaknak lam in kan pial i, vawlei a kalning le a zumh ning tahchunnak ah Social rights, human rights te pawl le vawlei nih a hman, attha a ti nain Bible he ai ralchanhmi chungah kan luh khin, kan tlaunak hram a thok cu asi. Minung kan si ve bantuk in, kan tluk le kan tlau caan zong a um ko lai, zumh lo ding le zulh loding kan zulh caan a um ko lai. A um phung asi ko NAIN, zeitik caan poh ah Pathian duhnak asihnga maw? A kan cawnpiak ningcang asi maw? Timi te kha i hal kho peng hna usih law a ttha tuklai timi kha, chim ka duh.

14. Kann biahalmi nan kan leh caah kan i lawmtuk.
Lehnak: Sianerhnak le dawtnak te he bia na ka hal ve caah ka lawmtuk ve.

 

Click to comment

Leave a Reply

Your email address will not be published. Required fields are marked *

More in Celebrity

Facebook

Rel Bikmi

Advertisement
To Top