Connect with us

Chungkhar Nu Le Va Nih Hrial Ding Thil Phun (10)

chungkhar nuleva

Education

Chungkhar Nu Le Va Nih Hrial Ding Thil Phun (10)

(1) Mi hmai ah nupi/pasal sual phawt

Lei le dang hmanh aa seh ti a si bantuk in chungkhar dirhnak a hun sau deuh tik ah lung i hmuh lonak tete cu a um ttheo tawn, Mi hmai zong hrial loin mah le nupi pasal le sual phawt ah cun buainak cu mei alh bang in a tho, A donghnak ah cun ahohmanh i ngaihthiam khawh lo dirhmun tiang a phan kho mi a si, Cu ruangah na nupi siseh na va siseh mihmai ah sual va phaw hrim hrim hlah, Zapei zong pakhat lawng in bengh khawh a si lo.

(2) Fanu fapa hmai ah i sik cak

Hringtu nu le pa timi cu fale nih bochan mi kan si lengah an i dornak a si fawn, Nan kar lak ah buainak a um zongah na fale cu va hrial hrim hrim hna, Nu le va kar buainak cu pumpak kong deuh ah a si, fale nih nu le pa an i sik cak lio an hmuh ah cun hmailei kar an hlannak ca tiang hnahnawhnak a pek khawh hna, Abiana ah fale nih chungkhar a thawtnam an theih lo ah cun tuchin fapar ca tiang rawhralhnak a chuahpi khawhmi a si.

(3) Nupi pasal le damlo caan ah i sik velh

Na nupi a si ah na pasal a si ah damlo caan ah hin lung a zor i thinlinh a fawi khun, Hi lio caan i sikcak nak a chuah sual a si ah cun inn chungkhar tthencheunak tiang a phan khomi a si.

(4) Hma tthing coih tthan lengmang

Sikcak caan paoh ah hma tthing coih lengmang hi hrial bak ding a si, Shihni hmanh an palh kho sibawi te zong an thi kho tibantuk in minung paoh nih palhnak pakhat khat cu aa ngei dih, Cu bantuk in hma tthing kha tuk fung i na hman peng ko ah cun inn chungkhar rem tthannak caah a har tuk cang lai.

(5) Na nupi pasal i a chungkhar chungah fahnak bia tamtuk chim hlah

Nu le pa sikcak tik ah pakhat khat kong lungtlin lo ruangah a cang tawnmi a si, Hi bantuk sikcak lio caan ah na nupi siseh na pasal siseh a cingla rualchan chim hnawh nak biafang hman hi na hrial ding hrim hrim a si.

(6) Thil ri hlonh

Nu le va i sikcak cang ah cun au aw thawng cu a thang ti theih cio a si, Cu chinchap i thilri hlonh mi a kuai a man thawng he aa cawhbruh rih ah cun buainak a sang chin chin, I duh le dawt ruangah nu le va cu i umh a si lo maw, Thil ri hlonh i a tla a kuaimi thawng cu thinlung a kekkuai mi he aa khat ko.

(7) Lungfah nak bia chim

Thinlinh ter hi cu a poi deuh lo, Thinlung fah hi cu a poi tukmi a si, Lungfah nak bia chim hi cu hrial ding bak a si, Nangmah kan bochan ah cun kutdok dirhmun ka phan lai, hawi pasal le khi zoh hna hmanh nangmah he cun van le vawlei in nan i thlau ti bantuk bia hna cu chim hrim hrim lo ding.

(8) Thihnak in i hrocer

Nun hnawhchan ka ngei lo, Nun ka zuam ti lo, Na hmaika bak ah kaa that lai tibantuk in i hrocer hi hrial ding hrim hrim a si.

(9) Kut thlak hman

Zeitluk na thinlinh zong ah kut thlak cu hmang hrimnhrim hlah, Voikhat te na kut na zo sual a si ah cun, nan i duhnak vialte kha a zin he a karh he na sung dih lai, Lenglang hliamhma cu thlop khawh a si, Chung lei hma cu thlop ding ah a har tuk cang.

(10) Kan i tthen lai timi biafang fawituk in chim hmang hlah

Aho kan si paoh ah thinlinh lio ah cun zeipaoh va cang ko seh timi lungput kan ngei dih hna, i tthen u sih timi biafang hi ttih a nung tukmi biafang a si, A ttha bikmi cu chungkhar ah i sikcak lo hi a si, Dawtnak timi cu chungkhar dirhnak a sau deuh ah cun a hlan bantuk in a tlum al nak a zor deuh kho men, Asinain pakhat le khat man ngei ah i chiah hi a biapi bikmi a si.

Click to comment

Leave a Reply

Your email address will not be published.

More in Education

Facebook

Rel Bikmi

To Top