Chin

Chinpa ( Bawi Ring) Nih Boxing Thongh In Tuanbia Thar Tialhram Athok Ve

Published on April 30, 2019

US Indiana ah khuasa mi Chin Pa Bawi Ring nih Boxing thongh in tuanbia thar tialhram a thok ve, ramkip um Chin mipi nih thazaang rak pe cio hna usih, Bawi Ring hi zephai khuami asi. Pu Thang Bik le Pi Sa Men fale 5 hna lak ah Upa bik asi.

Tu kum 2019 lawng in boxing thong aa thawk. Cu Boxing cu Amateur boxer ti asi i, Beginner pawl caah asi Round 3 tiang um mi asi Voi 2 aa thong teinak voikhat ahmu i voikhat a sung ve. Bawi Ring hi kum 21 minung te lawng asi rih i 2010 ahkhan US a phan mi asi.

Boxing hi 2019, February 25 ahkhan a rak lut ve, ariantuannak ah ahawile Mexico pa Alex le Miranda Pa Michel nih Boxing thongh hi an sawm Free asi lai an ti caah a lut colh ve mi asi. Amah pumpak hrimhrim nih Boxing hi a rak zoh peng mi le a uar tuk mi asi.

Kan hnu niruk zong ahkhan junior Olympic ah, 141 division timi ah minung pahnih an i phomh in Bawi Ring nih a tei caah champion asi. Mah Boxing hi Beginner, a hram a thokka mi pawl ca lawng ah asi zei pipa asi lo nain hmailei ah hinak sang deuh mi Boxing thonghnak ah luh thluahmah ka tim ko tiah Bawi Ring nih a chim.

Chin mi chung in Boxing thongh lei ah tuanbia tialtu pakhat ahung si ve lai, ramkip um mipi in thazaang rak pe cio hna usih, aa tinh mi ah a thlawhtling ko seh.