Connect with us

Australia Um Kaa Lunghmuihnak Pakhat

laica

Chin

Australia Um Kaa Lunghmuihnak Pakhat

Australia ram, Melbourne nichuahlei (eastern Melbourne) lei ahcun, thil khuaruahhar hi hmuh lengmang a si ko. Lairam ah a ummi kum 10 tang ngakchia nih Laica duhtawk tein a rel khawh khi, khuaruahhar thil a si lo. A ram ah heih a um fam cu. Asinain mirang ca duhtawk in a rel khawh a si ahcun cucu khuaruahhar deuh khi a si hnga. Nu le pa si hna seh, cawnpiaktu hna thazaang tampi chuah in a hnu lei in an dirhtthoh piak ti hi fiang tein a langmi a si.

Cu ve bantukin tthiam in Australia ram a tthangmi ngakchia hna nih Mirang ca duh tawk in an rel le nal hliahmah tein an chim khawh hi khuaruahhar thil a si bak lo. A ruang cu, mirang ram a chuakmi an si caah le an umnak ram cu mirang ram a si caah holh thiam hi cu a fawi tuk. Asinain Australia ram i kum 6 fai hmanh a tling lomi fa nih, Lai cauk i tlaih in Lai Bible a rel khawh hi cu, khuaruahhar lo awk a ttha lo. Tuak awk zongah kan ruah lem lomi , hringtu nu le pa le, Laica sianginn kainak cawnpiaktu te le Church School an kainak cawnpiaktu hna ttuanman theipar le nun hnek nun an temmi theipar a si ko tiah ka ruah.

Australia a um ruangah, tiin a ttha lei zong in a chim tiah ka ruat ko uh, Laica a duh bakmi ka si ve i, ka thiam huaha lo buin a uar bak vemi ka si tikah hi bantuk hmuh hi lung a nuam tuk. Tha zong a tho hringhran.

Australia Melbourne nichuah lei ahhin 80% ngakchia pawl hi kan laica an rel kho i, biafang kek tein an chim kho. Biakinn i pumh i ngakchia tete nih Bible cauk i tlaih in nal hliahmah tein an chim ko hrim ah lung a hmui tuk. Nu le pa le cawnpiaktu hna le cozah cung hrim ah lawmhnak a ngan hringhran. Nichuahlei sining lawng ka chimnak a ruang cu hmundang ah kaa chawhleh tuk lo caah a si. Hmailei ah kan ttial ve te lai.

Hmanthlak: Hi pa te hi Johan a si i, kum 6 hmanh a tling fang fang men a si hnga. Cauk te ai ken i, VCBC mino zaan pumh ah bible ca a relnak a si. Chikkhat te a philh sual caah Laica in a ttialmi cafang te cu aa lak i tling tein a rel khawh tthan. Laica rel a thiamnak a ruang cu nule pa le cawnpiaktu ruangah a si ko.

Hi bantuk hi hmuh ding an tampi rih. Laica lei ahcun Australia hi uang pi phu an si hrim ko. Tang 12 a dih cangmi zong an tampi. Lailei a ummi hna zong nih ram daw lo le miphun daw lo ah kan ruat bak hlah uh. Thil hmete a lo nain a lian tukmi rian pakhat a si tiin kan cohlan piak uh. Lairam um lo bakin Laiholh ttha te thiam hi a fawi hrim hrim lo. Sihmanhsehlaw hmailei ahhin miphun kilvengtu a si ahcun tiin ttuanvo an la cio. Cucu upat awk hrim le uang awk hrim a si ko.

Nawlnak: Hmanthlak hi nu le pa chimh ta loin ka tarmi a si caah, poipang a si cun ngaihthiam kan hal cia hna.

Catialtu Nusung Hrangtlung

Click to comment

Leave a Reply

Your email address will not be published.

More in Chin

Facebook

Rel Bikmi

To Top