Connect with us

Australia ah Tang 12 Mark 99.10 In A Awng Mi Ezekiel Biak Tha Ceu !

Mark

Chin

Australia ah Tang 12 Mark 99.10 In A Awng Mi Ezekiel Biak Tha Ceu !

Australia ram sianginn tang 12  awnnak ahhin Mark a sang bik cu 99.95 hi a si i cu ahcun Chin pa Ezekiel Biak Tha Ceu nih 99.10 in an kan awn piak, miphun cawisang tu asi caah lawmhpi phu asi, kan bia ruahnak rak rel ve, The Chin Online Media in biahaltu cu keimah Salai Amang@ June Amang ka si.

Halnak.1 Na Mintling zeidah asi?

Lehnak- Ka min tling hi Ezekiel Biak Ttha Ceu Kheng Lawt ka si.

Halnak.2 Na Chungkhar kong na kan chim kho hnga maw ?

Lehnak- kan chungkhar dihlak in Thantlang Peng Salen khua ah a chuak mi kan si, Ka Pa min hi Thang Kung asi, ka Nu min hi Tawk Rem Cinzah asi. Unau, pa lawngte 6 kan si i keimah hi a 5 nak ka si.

Halnak.3  Zeitik kum in dah Australia nan phak ? Australia na phak ah tang zeizat in dah naa thok?

Lehnak- 2009 ahkhan Malaysia in Australia ram a rak phan mi kan si. Australia ahhin kumkhat holh ka cawn hnu ah tang 3 in ka rak i thok.

Halnak.4 Tang 12 na kainak ah VCE ATAR ah Mark 99.10 bak na hmuh khawh caah khuaruahhar lei a si kan i lawmpi tuk, VCE ATAR cu zeidah a si fiang deuh in hun kan chim law kan duh ko.

Lehnak- Ka lawmtuk ve , a tawifiannak tein van chim khawh ka zuam lai,VCE ( Victorian Certificate of Education) hi ka kaimi a si i mah chungah cawnca 6 ka tuah. Cu hna cu: Hakha Chin, Biology, Further Maths, Methods, English (mainstream) le Chemistry ka tuah hna.

Mah ka cawnmi hna cawnca chung in a ttha cemmi 4 an thim hna i mah cu cu primary 4 ti a si.  Cawnca a 5nk le 6nk hi 10% ka mark kha an lak. Cu hna mark pawl cu a dihlak in an fonh hna i ATAR score timi an chuah. ATAR timi cu (Australian Tertiary Admission Ranking) asi phundang in chim ahcun hmuh mi mark pawl kha zeitluk sang dah an si tiah tahfung tuah nak asi, 80.00 hmuh ahcun, 80% nakin academic lei in mark hmuhmi a ttha deuh ti a si.
Ka mark kha an fonh dih i ka hmuhmi taktak cu 95.35 a si.

Asinain, bawmhnak pakhat a um i cucu SEAS timi a si. Mah hihi ahopaoh nih sawk khawhmi a si i, mah he hin cun ka ATAR hi 99.10 hrawng a si. SEAS nih hin a tuahmi cu kan harsetnak, asiloah ah tlamtlinlognak, kan umnak, ca kan cawnnak sianginn, mah cun tangka lei chambaunak, le refugee ruangah harsetnak te pawl hi zoh buin hin Atar hi an kai termi bawmhnak, ahopoah nih hmuh khawh mi a si.

Halnak. 5 Na cacawnnak ah na chungkhar nih zeitluk in thazaang an i pek?

lehnak-Ka chungkhar nihhin a hramthawk tein an ka cawnpiak, an ka dirkamh, mah cun an rak ka zumh fawn. Ca lei in cun an ka bawm kho lem lo, asinain anka ttanpi, thazaang an ka pek peng i thlacamnak in an ka bawmh peng.

Anmah thlacamnak le dirkamhnak thawng in Pathian nih a ka dawt i mah bantuk in mark ttha ngai zong a ka hmuhter. Anmah lo cun mah bantuk mark hmuh zong hi a fawi lai lo.

Halnak.6 University hi zeitik dah na kai lai, khoika Univerisity ah, zeidah kai na timh mi asi.

Lehnak -Uni hi Bawipa nih a rem a ti ahcun hmaikum in thawk colh ding a si. Atu lawlawse ah ka timhmi cu double degrees tuah hi a si.  mah cucu Bachelor of Engineering (civil) le Bachelor of Commerce an si. Atu ah ka lung ah a um mi cu Monash University hi a si. Melbourne University zong hi ka lung ah cun a um pah ve.

Halnak.7  Ramkip Chin mino le Australia Chin mino hna sin ah biacah na duh mi ?

Lehnak – Ramkip Chin mino hna le Australia Chin mino hna sinah biacah ka duhmi hna cu: kan theih pengmi ‘na tuh bangin na zun lai’ ti hi a si. Cucaah atu i kan caan kan pekmi le kan tuahmi poah hi hmailei ah a theipar kan zun lai ti theih butein cawlcang cio hna u sih law thilttha tuah i zuam hna u sih. Cun kan i timhlamh cio mi kan phak khawh nakhnga i zuamnak le lungsaunak a herh. Cu lawng si loin, Pathian le innchungkhar lawmhter hi a biapi tukmi a si fawn.

Click to comment

Leave a Reply

Your email address will not be published. Required fields are marked *

More in Chin

Facebook

Rel Bikmi

Advertisement
To Top